संखुवासभा । संखुवासभाको चैनपुर नगरपालिका–१ स्थित धार्मिक तथा पर्यटकीय क्षेत्र नुनढाकीमा बाला चर्तुदशीको अवसरमा खेलकुद तथा बृहत साँगितिक कार्यक्रम हुने भएको छ ।
आज सोमबार खाँदबारीमा पत्रकार सम्मेलन मार्फत कार्यक्रम बारेमा आयोजक मिल्के जनउत्थान मञ्चका अध्यक्ष सुदिप लिम्बूले जानकारी दिएको हो ।
‘कला संस्कृतिको संरक्षण तथा पर्यटन पूर्वाधारको पहिचान, नुनढाकीको विकास समृद्धिका आधार’ भन्ने नारासहित यहि मंसिर २६ देखि २९ गते सम्म प्रतियोगिता संचालन हुने जनाइएको छ ।
नुनढाकीको विकास र समृद्धिका लागि ब्यापक रुपमा प्रचारप्रसार गरी पर्यटकीय हवको रुपमा विकास गर्ने उद्धेश्यका साथ खुल्ला फुटबल, पालिका वडास्तरीय खुल्ला भलिवल र पब्जी प्रतियोगिताका साथै २८ गते विहीबार बृहत साँगितिक कार्यक्रमको आयोजना गरिएको अध्यक्ष लिम्बूले जानकारी दिए ।
कार्यक्रममा बृहत साँगितिक कार्यक्रम समेत रहेको छ । सो कार्यक्रममा राष्ट्रिय कलाकार मिलन नेवार, जेनिश राईका साथै स्थानीय ख्याती प्राप्त कलाकारहरुको बेजोड प्रस्तुती रहने जनाएको छ ।
फुटबल तर्फ विजेताले ट्रफी, मेडल र प्रमाणपत्र सहित नगद ८१ हजार १ सय ११ रुपैयाँ प्राप्त गर्ने छन् भने उपविजेताले ट्रफी, मेडल र प्रमाणपत्र सहित नगद ५१ हजार १ सय ११ रुपैयाँ प्राप्त गर्नेछन् । भलिबल तर्फको विजेताले ट्रफी, मेडल र प्रमाणपत्र सहित नगद ५१ हजार १ सय ११ रुपैयाँ र उपविजेताले ३१ हजार १ सय ११ रुपैयाँ प्राप्त गर्नेछन् ।
नृत्य प्रतियोगितामा प्रथम हुनेले नगद २० हजार रुपैयाँ द्वितीय हुनेले १५ हजार रुपैयाँ र तृतीय हुनेले १० हजार रुपैयाँ प्राप्त गर्ने आयोजकले जनाएका छन् ।
